Iron rod a nih tur ang ni pha lo tihtawp dan tur FCSCA Minister hoin sawiho

Food, Civil Supplies & Consumer Affairs (FCSCA) minister B Lalchhanzova leh All Mizoram Cement & Rod Dealer Association (AMCRDA) hruaitute chuan nimin khan Minister pisaah Mizorama iron rod lak luh zingah a len dan tur tling lo awm ṭhin chungchang an sawiho. Minister chuan, iron rod dik lote chu a dik lohna mipui hmuha pho lan ṭha a tih thu a sawi.

AMCRDA hruaitute chuan, hmun ṭhenkhat aṭanga Mizorama iron rod lak luhte'n standard size a pha lo tih an finfiah thu leh, an enchiannaah milimetre 10 tur mm 8.5 te, mm 20 tur mm 18.5 te, mm 16 tur mm 14 te tam tak an hmuh thu an sawi.

Iron rod a nih tur ang ni pha lo hman a nihin in sakte a chak tur leh ngheh tur ang a nih phak loh avangin mipui tan a him loh thu AMCRDA hruaitute chuan an sawi a; iron rod standard size dik chauh lak luh dan ngaihtuahpui turin Minister an ngen a ni.

B Lalchhanzova chuan, AMCRDA thu thlen chu bawhzui turin kawng hrang hranga hmalak a ṭul thu sawiin, "Home department, Legal Metrology, PWD, YMA leh NGO dangte nen pawh thawkhoa hmalak dan ngaihtuah a ṭul," a ti a; a rang lama meeting lian zawk koh thuai a tum thu leh, iron rod dik lote chu finfiahna nen a dik lohna pho lan a, mipui hmuha tlangzarh ṭha a tih thu a sawi.

FCSCA Minister chuan, standard size pha lo iron rod a awm chu pawi a tih thu a sawi a, "Mizo mipui himna a khawih avangin kan ngai thutak hle. Lirnghing nat theihna hmun, seismic zone V-a awm kan nih avangin kan in sakte mithiam ruahman ang leh bungrua pawh chutiang mil ang hman a pawimawh," a ti.