MizoTaxi-ah lut turin hriattir nawn

MizoTaxi application-ah Rs 500 pein June thla chhunga inziak lut vek turin Aizawla taxi-te leh auto rickshaw-te hriattir an ni a; hun tiam chhunga mipui mamawh tur khawp lirthei inziak lut an awm lo a nih chuan a ṭul angin MizoTaxi hnuaia tlân tur permit pek chhuah a ni dawn.

State Transport Authority (STA) chuan Mizotaxi app atana inziah luh chungchangah thuchhuah thar a siam a; MizoTaxi app-a inziak lutte tana inziah luh man lo tihchhuah tawh (Rs 600) chu thuneitute remtihnain lirthei pakhatah Rs 500-ah tihhniam a nih thu a tarlang.

STA chuan, registration fee chu lirthei tlan (service) hun chhung zawng atan a ni tih tarlangin, "A bak pek leh a ngai tawh lo ang. Aizawl khawpuia service lai two wheeler taxi, four wheeler taxi leh auto rickshaw te chu June 2026 chhungin Mizotaxi Office - DTO (LA) Office hnuai, Transport Complex, Chaltlangah registration tifel vek turin kan inngenin kan inhriattir nawn leh a ni," an ti.

MizoTaxi app-a lirthei inziak lut turte chuan lirthei document felfai, driving licence leh voter identity card ken tur a ni tih STA chuan a tarlang a; hun tiam chhunga mipui mamawh tur khawp lirthei inziak lut an awm lo a nih chuan, a ṭul angin MizoTaxi hnuaia tlan tur permit pek belh a nih dawn thu a tarlang bawk.