Doppler Weather Radar lungphùm phúm

Disaster Management & Rehabilitation (DMR) minister Prof. Lalnilawma chuan nimin khan Secre-tariat conference hall-ah Indian Meteorological department (IMD), Ministry of Earth Sciences buatsaih, ‘X-Band Doppler Weather Radar’ lungphùm a phúm.

Sorkar thuchhuah tarlan danin, X-Band Doppler Weather Radar hi India hmarchhak biala khaw chin hriat lâwkna atana hman tur a ni a; khuarel chhiatna laka invenna atan te, kut hnathawktute leh thlawhtheihnaa zin veivâkte tana hman ṭangkai theih tur a ni.

Prof. Lalnilawma chuan, Mizoram chu chhiatrupna thlen nasatna a nih avangin khawchin hriat lâwkna khawl chu a mamawh berte zinga mi a nih thu a sawi a, "Tunlaiah information hmanga ram hrang hrang an intlansiaknaah information ngah ramte chu ram chak an ni zel. Mizoram pawhin radar system hmang hian khaw chin hrilhlâwkna chipchiar zawk a nei thei ang a, inpuahchahna ṭha zawk neiin nunna tam zawk chhan phah a nih ngei ka beisei," a ti.

DMR secretary Udit Prakah pawhin thu sawiin, "Khuarel chhiatna thleng thei laka invenna leh chhiatna thlenga hmalaknaah department pakhat mai ni loin, agency hrang hrangte thawhhona a pawimawh," a ti a; IMD chu khawchin dik leh fiah tak report ṭhin turin a ngen a ni.

X-Band Doppler Weather Radar hi DDK campus, Leitanah bun a ni a, a bunna atan cheng vbc 10 sen a ni. June 1, 2026 khan hnathawh ṭan niin, October 9, 2026 ah zawhfel tur a ni.