Industrial area-a dik lo taka ram neite chungah sorkar a khauh dawn - Minister

Commerce, Indus-tries, Geology & Mining (CIGM) minister F Rodingliana chuan, industrial area huam chhunga dik lo taka ram neite chungah khauh takin sorkarin hma a lak dawn thu a sawi.

Minister hian June 5, 2026 khan Zuangtuia Industrial Estate tlawhin, Mizoram Industries Owner’s Association hruaitute nen an inkawm a; "Industrial area huam chhunga dik lo taka ram neite chungah khauh takin hma kan la dawn. State tan industry-a hmasawn a pawimawh em em a, sorkarin a hre chiang a, entrepreneur leh industry hmasawnna atan environment ṭha siam turin theihtawp kan chhuah reng a ni," a ti.

MIOA hruaitute hian Mizorama kutkawih eizawnna buaipuitu (entrepreneur)-te'n industry dinna tur ram an hmuh zawh tawh loh thu leh, industrial area awm sate pawh mi dangin an tihbuai avangin harsatna an tawh thu Minister an hrilh a; an harsatna tawh chuan Central scheme an dilna thlenga a tihbuai thu an sawi.

F Rodingliana chuan, MIOA hruaitute'n industrialist-te harsatna tawh hrang hrang an lo thlen chungchangah, harsatna sukiang turin sorkarin theihtawp chhuahin ngaihtuahna a sêng mek tih a hrilh.

Industries Minister hian Zuangtui Industrial Estate huam chhunga industry hrang hrang - plastic tanky industry, handloom industry, water bottling plant, toughened glass siamna leh Tin Roof industry te tlawhin, an hnathawhte a en a; CIGM joint secretary Lalchhandami, additional director Lalhmunsiama leh ZIDCO managing director LP Lalchangkima ten an ṭawiawm a ni.