IOC-in ZMCH hnenah bungrua an hlan; 'Nunna chhanhimna a ni' - Health Minister

Indian Oil Corporation Limited (IOC) chuan corporate social responsibility (CSR) kaltlangin nimin khan Zoram Medical College & Hospital (ZMCH)-ah cheng nuai 62.38 hû bungrua an hlan. Inhlanna hun hmanpuitu Health minister Lalrinpuii chuan, bungraw hlante chu Mizo mipui nunna chhanhimna tur a nih thu a sawi.

IOC hian ZMCH hnenah damlo na zual enkawlna tur khawl (critical care equipment) leh advanced life support ambulance an hlan a ni.

Bungraw inhlanna inkhawmah Lalrinpuii chuan IOC chungah a lawm thu a sawi a, "Mizoram health care service hmasawn zelna atan Rs 62,38,548 hû kan dawng hi IOC-in khawtlang hriselna leh damlote himna an ngaih pawimawhzia tilangtu a ni," a ti.

Health Minister chuan, "IOC aṭanga ZMCH thil dawnte hi hmanrua a nih mai bakah, Mizoram mipuite nunna chhanimna a ni a, rîkrum thila rang zawka inenkawlna leh surgery (inzaina) lama ram hmasawnna atana investment pawimawh tak a ni," a ti a; IOC chu nakin zel atan pawh thawhpuiah a sawm.

Mizoramin neurosurgery-ah hmasawnna tur an la ngah thu sawiin Lalrinpuii chuan, "Damlo neurosurgical care mamawhte'n loh theih lohna avangin state pawn lama inenkawlna an zawn a ngai ṭhin. Neurosurgery unit dinna tur ruahmanna siam zawh a ni," a ti.

IOC chief manager Malati Malakar pawhin thu sawiin, "Mizoram health care system-in hma a sawn zelna atana lungphum pawimawh tak a ni. IOC chuan India hmarchhak state-te a ngai pawimawh," a ti a, sorkarin CSR atana pe chhuak tura a beisei aia tam an pek ṭhin thu a sawi.

ZMCH-in khawl an dawn C-Arm Machine chuan orthopaedics (ruh), general surgery, urology leh trauma care lamah a pui dawn a; diathermy machine-in him zawka inzai a nih theih nan nasa takin a pui thei dawn. Advanced life support ambulance-in damlo dinhmun hlauhawma dingte him leh rang zawka phurhna leh ambulance chhunga treatment pek theihna kawngah a pui thei dawn a ni.