SIR kalpui mekah Lunglei district-ah enumeration form 75,826 sem tawh

Lunglei district election officer (DEO) Navneet Mann, bawrhsap chuan nimin khan a pisaah Lungleia thuthar thehdarhtute a kâwm a; uluk zawka electoral roll ennawnna, Special Intensive Revision (SIR) neih meka Lunglei district-a hmalakna leh hmachhawpte a hrilhfiah. Lunglei district-ah enumeration form 75,826 sem a ni tawh.

Navneet Mann chuan, SIR chu electoral roll-a chuang tur dik takte kim taka an tel a, tel lo turte paih an ni a, electoral roll dik leh felfai tak a awm theihna tura hmalakna a nih thu a sawi a, "Election Commission of India leh Mizoram Chief Electoral Officer aṭanga tih tur ruahmante Lunglei district-ah ṭha taka hlen chhuah zel a ni," a ti.

May 30, 2026 aṭangin BLO-te'n an huam chhunga in tinah kalin, enumeration form an sem a, an dahkhahpui bakah an lak khawm mek thu a sawi a; SIR chu mipuiin an ngaih pawimawh a ṭul thu sawiin, SIR chungchanga hmalaknate mipui hnena puanzar kawngah media thawhpuina leh ṭawiawmna a ngen a ni.

Tarlan danin, Lunglei district-ah hian BLO-te'n chuan enumeration form an sem chhunzawm zel a, district pumah enumeration form 75,826 an sem tawh a, chu chu sem tur zat aṭangin 73.59% a tling.

Lunglei district-a Assembly constituency paruk - Lunglei North, Lunglei East, Lunglei West, Lunglei South, Thorang leh West Tuipui-ah voter 1,03,037 an awm mek a; polling station 180 leh BLO 180, BLO supervisor 28 leh assistant BLO 64 an awm. SIR atan political party hrang hrang aiawh booth level agent mi 580 ruat a ni bawk.