ECI Deputy Director-in SIR a sawifiah; Zâwh chian hreh lo turin mipui a chah

Election Commission of India (ECI) deputy director (Media) Apurva Kumar Singh chuan nimin khan Aizawl Press Club-ah thuthar thehdarhtute a kâwm a; electoral roll leh voter-te endikna Special Intensive Revision (SIR) 2026 kalphungte a sawifiah a, SIR chung-changa hriat chian tâwk loh neite chu BLO-te zâwt chiang turin a chah.

Apurva Kumar Singh chuan, SIR 2026 chu India ram pum huap electoral roll ennawnna leh siamṭhatna pawimawh tak a nih thu a sawi a, "Electoral roll dik, felfai leh rintlak siam tumna beihpui a ni. Ram pum huapin phase hrang hrangin kalpui a ni a, Mizoram hi Phase III-ah telin, state dangte rualin hmalak mek a ni," a ti.

Mizoramah May 30, 2026 khan enumeration phase ṭan a nih thu sawiin Apurva Kumar Singh chuan, "Booth level officer (BLO)-te in tinah kalin enumeration form an sem a, khawn khawm leh enfiahna hna an thawk mek. Hmaih an awm lohna turin BLO-te hi a tlem berah vawi thum tal in tin tlawh chhuak tura tih an ni," a ti a; India khua leh tui, vote nei thei zawng zawngte electoral roll-ah an tel vek theih nan ṭan lak a nih thu a sawi.

ECI Deputy Director chuan, ECI-in SIR 2026 kalpui turin ram pum huapin field level election official tam tak a ruat thu a sawi a, "Mizoramah pawh BLO te, political party tin aṭanga ruat booth level agent (BLA)-te leh election official dangte'n in tinah campaign leh mipuite ṭanpui hna an thawk mek. India Constitution leh electoral roll siam dan tur Danpui zâwm chungin kalpui a ni," a ti a; SIR chungchanga hriat chian tâwk loh neite chu bialtu BLO-te zawt hreh lo turin a chah a ni.

SIR 2026 chu langtlang taka kalpui a nih thu sawiin, Apurva Singh chuan, "Hmaih palh a awm palh pawha siamṭhat lehna hun leh, insawifiahna hun a awm dawn," a ti a; draft electoral roll siam hunah mipui en theih tura tihchhuah a nih dawn thu a sawi.

Apurva Kumar Singh chuan, SIR-ah hian a bikin kum upa lam te, rualbanlote leh dimdawi ngai bikte tan awlsam zawka a tel theih nan ruahmanna siam a nih thu a sawi a, "Vote nei thei zawng zawng hmaih awm loa an tel theih nan ECI chuan theihtawp a chhuah," a ti.

Zawhna hrang hrang chhangin Apurva Kumar Singh chuan, vote neih theih dan te, enrolment leh siamthat hna kalpui dan te, kumtling tharte electoral roll-a thun dante leh SIR 2026-a political party-te pawimawhnate a sawifiah. Theihtawp chhuaha Election official-te thawhpui turin media-te a sáwm bawk.