Young Indians Parliament buatsaih a ni; 'Ṭhalaite'n ngaihtuahna i sêng ang u' - Assembly Speaker

Young Indians, Mizoram Chapter chuan nimin khan Assembly Annexe conference hall-ah Young Indians Parliament, City Round 2026 an buatsaih a, Assembly speaker Lalbiakzama'n a hawng. Speaker chuan, ṭhalaite'n politics an ngaihven a ṭul thu sawiin, ngaihven turin a sáwm.

YI Parliament City Round hi zirlaite’n leadership ṭha, mawhphurhna leh sorkar inrêlbâwlna chungchang an hriat theihna tura buatsaih a ni a, City Round aṭang hian award chi hrang hrang 15 siam a ni dawn. A ti ṭha zualte chu regional level competition-ah tel turin tirh an ni dawn a, regional level-a ti ṭha zualin state aiawhin New Delhi-ah national level intihsiakna an hmachhawn leh ang.

Intihsiak chhung hian zirlaite chu sorkar (ruling) leh opposition-ah ṭhen an ni a, rorelna in sanga tih ṭhin angin an bial (constituency) tana thil pawimawh chi hrang hrang sawihona te, zawh leh chhanna hun bakah, bill-te sawiho a ni.

Assembly Speaker chuan, "Kan duh emaw, duh lo emaw, kan ram hruaitu tura kan thlan tlin apiangte kaihhruaina hnuaiah kan awm a ngai. Chuvangin, min hruaitu tur kan thlan dawn hian ngaihtuahna kan sen a ngai. Ram hruaitu thlanna hi mi lâr emaw, mi fêl ber emaw kohhran hruaitu thlanna a ni lo," a ti a; an ngaihtuahna ngun taka sêng turin ṭhalaite a chah.

Lalbiakzama chuan, tu nge ram kaihruaitu atan ṭha ang a, tu nge a ngaihna hria a, tuin nge dinhmun ṭha zawkah min hlâng kai thei ang tih ngaihtuaha Mizo ṭhalaite'n ram dinhmun leh politics kalphung ngun taka an zir a ṭul thu a sawi a, "Chumi tur chuan kan nu leh pate emaw, kan pi leh pute kan beisei ngawt tur a ni lo," a ti.

Kal dan pangngai ringawt ni lo, ngaihtuahna fing leh zau zawk put zel a ṭul thu sawiin Speaker chuan, "A ṭul hunah chuan rilru huaisen tak puin pên chhuak ngam ila, state hmasawn zawka an kalphung kan ban phak tawka awmte copy paste zelin ṭan la thar ila a duhawm. Social media hmanga thu belhchian dâwl lo, tlanchhe chunga mi dang beihna a tam hle, ngaihtuah chian chuan a dawihzepthlak," a ti a; thu dik tawk lo leh tlanchhe chunga mi beih ang chi chu sim a hun thu a sawi.

Assembly Speaker chuan, politics-ah insawichhe tawn leh thu awmze nei loa inbei chiam chiam loin a kal theih tih sawiin, "Issue-te khelin, debate awmze nei te pawh a neih theih. Chu'ng atan chuan policy-te sawihoin, ideology kan neihte phawrh tlang ila, zawi zawiin kan ram hi kan siam ṭha thei ang. Vawi leh khata sang taka invawrh a harsa tih kan hre theuh a, chutihrual chuan, tun aia ṭha hian kan ti thei chiang a ni," a ti.

Lalbiakzama chuan, ṭhalaite'n politics an ngaihven chuan ṭhalai fel leh fing zawkte a cho chhuah ngei a rinawm thu sawiin, "Tuna politics huanga lut kum naupang zawkte hian kum upa zawkte aiin ram hruaina kawngah an hnufûm loh zawkzia te, kum naupang têin ram an hruai ve thei a ni tih hi lantir thei se chuan, ṭhalai dangte politics huang chhungah luh duhna a neihtir ang," a ti a; mi ṭha leh felte'n ram rawngbawl duhna an neih chuan tun aiin ramin hma a sawn tur thu a sawi.

Khualzahawm Vanlalzawma, Lok Sabha MP hlui pawhin thu sawiin, "YI Mizoram Chapter-in hetiang intihsiakna an buatsaih hi a lawmawm," a ti a, zirlaite hnenah MP a nih anga a tawnhriatte a hrilh.

Mizoram Legsilative Assembly-a additional secretary Lalthangmawii'n intih-siaknaa telte hnenah Parliament kalphung leh inkaihhruai dan a sawifiah bawk.

YI hi Confederation of Indian Industry (CII) hnuaia ṭhalai pawl (youth wing) a ni a; a tum ber chu - ram hmasawnna tura kawng hrang hranga hmalak a ni. YI Mizoram Chapter pawh hian kum 2002 aṭang khan kawng hrang hrangin hma an lo la tawh ṭhin a, thingtlang lam hmasawnna, zirna, infiamna, hriselna leh CSR-te chu an hmalakna langsar zual a ni.

YI Parliament hi Yi National flagship hnuaia hmalakna pawimawh tak zinga pakhat a ni a; India ram ṭhalaite zingah leadership, constitutional value leh active citizenship siam len tumna a ni. Mizorama City Round-ah hian ṭhalaite public discourse leh nation-building lama ṭhahnemngaihna a pek beisei a ni bawk.