Rs 33,87,200 hu ruihhlo tiral

Mara Thyutlia Py Hqrs chuan MTP kumpuan ‘Ruihhlo do’ puala beihpui an thlâknaa thla khat chhunga ruihhlo an man Rs 33,87,200 hu chu nimin khan an tiral a, Social Welfare minister Lalrinpuii'n a hmanpui. Minister chuan, damdawi zuar tura sorkarin phalna a pek zinga ruih theih thil zuar ṭhinte chu ti tawh lo turin a ngen.

MTP pisa tuala ruihhlo tihralna inkhawmah Lalrinpuii chuan, sorkarna fawng an vawn tirh aṭangin Mizoram sorkarin ruihhlo do a ngaih pawimawh tak zet thu a sawi a, "Dan ang taka damdawi zuar tura sorkarin phalna a pek pharmacy ṭhenkhat aṭanga damdawi zawrh phal loh zuar te, licence mumal nei loa ruih theih thil zuar tâwk an awm ṭhin hi a pawi a, hetiang ti ṭhinte chu ti tawh lo turin ka ngen a ni," a ti.

Lalrinpuii chuan, Mizoram Social Defence & Rehabilitation Board leh Nasha Mukh Bharat Abhiyan (NMBA) kaltlanga sorkarin khawtlang thenfai a tumnaah MTP leh tlawmngai pawl hrang hrangin theihtawp an chhuahpui ṭhin hi lawmawm a tih thu a sawi a; Siaha district tithianghlim a, ruihhlo awm lohna district a nih theih nan theihtawp chhuah zel turin tlawmngai pawlte a chah.

Ruihhlo tihralna inkhawm hi MTP president S Vabeihasa-a'n a kaihruai a; codeine bûr 2,228, tapentadol bâwm 103 leh tlêp 13, spasmend tlêp 890, micro gaba tlêp 300, heroin hawng 6, rakzu litre 160, sapzu ûm 9 leh beer bûr 24 tihral a ni.