Kolasib-a sorkar hmalakna leh zirna-inte Union MoS L Murugan-a'n a tlawh kual

Sorkar laipuia Infor-mation and Broadcasting ministry leh Parliamentary Affairs ministry enkawltu minister of state Dr L Murugan chuan nimin khan Kolasib-a sorkar hmalaknate leh zirna-inte a tlawh.

Dr L Murugan hian nimin khan Regional Sports Training Centre, Saidan tlawhin, RSTC zirlaite'n football match an lo entir a, Centre tihchangtlun lehzualna tura hmalak dan turte an sawiho.

PM School for Rising India atana puan Kolasib-a Model Primary School-I a tlawhnaah zirlaite nen an inkâwm a; L Murugan chuan, India ram chu kum 2047-ah chuan ram hmasawnna tluantling nei turin a inbuatsaih mek tih sawiin, inbuatsaihna a hlawhtlin theih nan zirlaite an pawimawh thu a sawi.

Union MoS hian Kolasib Diakkawn H/S a tlawhnaah NCC-in parade-in chibai an lo bûk a, zirlaite'n Mizo hnam lâm an entir bakah, naupangte'n an thiamthil hmanga an siamte an lo entir a; zirtirtu leh zirlaite nen an inkâwm.

Dr L Murugan hian Audrene Scism Children's Home, Khuangpuilam tlawhin, thawktute'n naupang awm mekte dinhmun leh an enkawl dante an lo hrilh a; Kolasib Vengthar Anganwadi Centre tlawh lehin, thawktu te, naupangte leh nu leh pate nen hun an hmangho.

MoS Dr L Murugan hian ICAR, Kolasib hmalaknaa kalpui tur 'Khed Bachao Abhiyan' leh 'Weather based Agro - Advisories for Climate resilient Farming in Mizoram, A Compilation of Success Stories' tih lehkhabu a tlangzarh a, ICAR leh KVK hotute nen an inkâwm. L Murugan chuan, kut hnathawktute'n thlai hrisel zawk an thar tam lehzual theih nan tunlai thiamna thar ber pek zel a pawimawh thu a sawi.

Union Minister ho Kolasib bawrhsap H Dolianbuaia, SP Lalrinpuia Varte, district education officer Vanlalchhana leh district child protection officer C Lalremruati ten an ṭawiawm a ni.