Siaha Nursing School kumina luah theiha peih turin HFW Minister-in contractor a hrilh

Health & Family Welfare minister Lalrinpuii chuan nimin zing khan Siaha Nursing School sak mek leh Maraland Gospel Centenary Hospital a tlawh a; Nursing School chu kuminah luah luh ngei a nih theih nan theihtawp chhuah turin contractor-te a chah.

HFW Minister chuan, Nursing School sak mek, peih thawkhat tawh, luah luh theih loha a la awm chu pawi a tih thu a sawi a; luah luh thuai a nih theihna tura hmalak ngai leh tih ṭhat ngai laite enpuiin, kumin chhung ngeia luah luh a nih theih nan ṭan la turin contractor-te a chah a ni.

Maraland Gospel Centenary Hospital a tlawhnaah Lalrinpuii hi thawktute nen an inkawm bakah, damdawi-in chhung a fang kual a; Health Minister a nih angin, mamawh an neihte chu a hnena thlen ṭhin tura chahin, "Siaha district-in hriselna lama hma a sawn theih nan kan ṭan rual a pawimawh," a ti.

Health Minister hi Mara Autonomous District Council-a chief executive member M Laikaw leh sorkar official-te'n an ṭawiawm a ni.

HFW Minister hian nimin khan Siaha District Hospital-a CT Scan khawl thar leh RtPCR laboratory thar a hawng. Minis-ter chuan, Rt-PCR Lab thar leh CT scan thar chu Siaha District Hospital tan bung thar kaina chhuanawm tak a nih thu a sawi.

Lalrinpuii chuan, District Hospital-a thawkte thawhrimna leh inpekna chhuanawm a tih thu sawiin, "In inpekna hian rah duhawm tak a chhuah fo a ni. Hospital-in service a pek theihte a tam thei ang ber mipuiin an hriat theih nan uar leh zuala inzirtirna neih a pawimawh a, khawl ṭha tak takte hi ṭangkai taka hman a nih theih nan mipuiin an hriat a pawimawh," a ti.

Minister Lalrinpuii hian June 2, Thawhlehni khan Siaha Tourist Lodge-ah district bawrhsap VL Hruaizela Khiangte leh sorkar department hotu te, tlawmngai pawl aiawhte leh political party aiawhte a kâwm a; Siaha district-a sorkar department hrang hrang thawhhona chu fakawm a tih thu sawiin, district hmasawn nan theihtawp chhuah tlang turin a fuih.

Lalrinpuii chuan, Siahaa hriselna lama thawktute chhuanawm a tih thu sawiin, "Sikserh leh rannung seh (scrub typhus) laka beihpui thlaknaah an chhuanawm tak zet a ni," a ti.