KHAWTHLIR

Lawmpuina hlan

Central YMA chuan nimin khan CYMA Hall-ah kumin HSLC leh HSSLC-a top 10-a lang Mizote chawimawina hun a hmang. Inkhawm hi CYMA vice president Prof. Lalnuntluanga'n a kaihruai a, CYMA president R Lalngheta'n thu sawiin, zirlaite chu ram leh hnam rilru pu chunga lehkha zir zel tur leh, central service-ah luh tum turin a chah. CYMA Education Sub-Committee assistant secretary Dr Lalhruaitluanga'n fuihna thu a sawi bawk. Lawmpuina hlante hi HSLC-ah mi 18 leh HSSLC-ah mi pakua an ni.

Property Tax zirho

Aizawl Municipal Corporation-in Property Tax zir chiang tura study team a din chu nimin khan an ṭhukhawm a, executive corporator i/c Property Tax Vanlalfaka'n a kaihruai. Mumal leh felfai zawka Property Tax khawn dan tur leh chhiah tling khawm mipui tan ṭangkai zawka hman dan tur te, state sorkar leh local council-te nen ṭanho dan turte zirho a ni. Study team hian an zirchianna leh rawtna chu July 20, 2026 ral hmain Mayor hnenah a thlen dawn a ni.

MUHCS zawm

Zarkawta Trinity Daycare Centre, Zemabawka NISSI Healthcare leh Kolasib-a Nazareth Nursing Home te chu June 2, Thawhlehni khan Mizoram State Health Care Society nen inremna an ziak. Mizoram Universal Healthcare Scheme zawm thar pathumte nen hian Mizorama mimal leh kohhran enkawl damdawi-in 18 leh daycare centre panga ten MUHCS an zawm tawh a ni.

MP hoin ṭhukhawm

Lok Sabha MP Richard Vanlalhmangaiha hoin nimin khan Serchhip District Development Coordination Monitoring Committee an ṭhu a, centrally sponsored scheme hrang hrang hmanga hnathawhte an thlirho. MP chuan, sorkar laipui programme leh scheme-te chu a hlâwk thei ang bera hman a nih theih nan theihtawp chhuah turin kal khawmte a chah.

Tourism sawiho

Mamit District Tourism Destination Management Committee chu an chairman Suvigya S Chandra, bawrhsap hoin June 2, Thawhlehni khan an ṭhukhawm. Mamit district-a village council zawng zawngin khualzinte tana tlawhpawh mai theih tur hmunhma an neih theihte DC office-ah hriattir ni se, an ti.