GST a luh ṭhat loh chuan sorkar a buai phah thei - F Rodingliana

Mizoram Merchant Association (MIMA) pisaah nimin khan Commerce & Industries minister F Rodingliana chuan GST training chhuakte lawmpuina hun a hmanpui a; Goods and Service Tax (GST) a luh ṭhat loh chuan sorkar a buai phah theih thu a sawi.

Commerce & Industries Minister chuan, GST ngaih pawimawh a ṭul thu sawiin, "GST a luh ṭhat loh chuan sorkar pawh kan buai phah thei. MIMA hi pawl ṭangkai tak a ni a, sumdawng hrang hrang, bazara ṭhute aṭanga showroom nei thlenga min phuar khawmtu a ni," a ti.

F Rodingliana chuan, GST chu sumdawngte'n an pek avangin a kalhmang hriat chian a ṭul thu a sawi a, "Tuna training chhuakte hi mi dangte zirtirtu tur in ni," a ti a; training chhuakte chu dawhthei taka mamawhtute pui tur leh an thiamnate ram tana ṭangkai taka hmang turin a chah.

Inkhawmah hian GST training chhuak mi 13 hnenah certificate leh memento hlan a ni a; training petute chu National Academy of Customs, Indirect Taxes & Narcotics (NACIN) Shillong leh CGST Commissionarate Mizoram an ni.