Film siamtu liante Mizorama shooting ti turin ka sawihmuh dawn - IB Minister
Information and Broadcasting ministry leh Parliamentary Affairs ministry enkawltu minister of state Dr L Murugan chuan, India rama film siamtu liante Mizoramah shooting ti tura a sawihmuh dawn thu a sawi.
Dr L Murugan hian June 2, Thawhlehni tlai khan Kolasib DC conference hall-ah sorkar department hotute leh tlawmngai pawl - YMA, MHIP, MUP leh MJA aiawhte a kâwm a ni.
Information & Broadcasting Minister chuan IB Ministry chungchang sawiin, Mizorama film siamtute International Film Festival, Goa leh hmun dang dangah an tel thei chu lawmawm a tih thu a sawi a, "Film siamtu lian tak takte Mizoram hmun mawi tak takah shooting ti turin ka sawihmuh dawn a, tourism leh cinema lamah theihtawpa hma lain hmasawn zel kan tum dawn a ni," a ti.
Sorkar laipuiin hmarchhak bial a ngaih pawimawh thu sawiin L Murugan chuan, "PM Narendra Modi leh sorkar laipuiin hmarchhak hmasawnna a ngai pawimawh hle. PM chuan hmarchhak bial hmasawnna hi India ram hmasawnna a ni a ti ṭhin a, chuvang chuan, mipui hmasawn theih nan kawngpui leh hmasawnna ruhrel tihchangtlun kawngah pawh nasa takin hma a la a ni," a ti a; sorkar laipui zarah Mizoramah hmasawnna a pun nasat thu a sawi.
Dr L Murugan chuan, "State sorkar leh Central sorkar, DoNER Ministry te ṭang kawpin district leh state hmasawnna turin thâ an thawh nasa a, hmasawnna kalpuina tura ngaih pawimawh kan nih angin sorkar laipuiin Mizoram a duhsak hle a ni," a ti.
Zirna chungchang sawiin L Muguran chuan, "Primary education hi a bulṭhut a nih avangin a pawimawh. Zirlai zirna bànsan (dropout rate) a sang hi a pawi a, heng naupangte leh an nu leh pate fuihna kawngah theihpatawp chhuah a tul," a ti a; PM Surya Ghar (in tina solar vuahna) chungchangah theihtawp chhuaha hma la turin L Muguran chuan kal khawmte a chah.
Union Minister chuan, infiamna leh hmeichhe dinhmun chawikanna lamah Mizoram hmasawnna hmuh tur a awm chu lawmawm a tih thu chuan sawi a, "Inkalpawhna a ṭha chho zel a, tunah chuan Delhi leh Sairang inkarah Rajdhani Express a tlan tawh a, hei vang hian Mizoramah khualzin a pun nasa hle a ni," a ti.
Inkawmnaah hian Kolasib district chungchang leh sorkar laipui scheme hrang hranga hmalaknate tarlan a ni a, zawhna leh chhanna hun hman a ni bawk.
Dr L Murugan hian June 2 vêk khan Kolasib District Hospital tlawhin, damdawi-in hmunhma a fang a; Medical Superintendent leh thawktute nen an inkawm a ni.