Phalna nei loa tuialhthei zawrh khap

Aizawl district magistrate Lalhriatpuia chuan thupek chhuahin, sorkar hriatpuina loa petrol leh diesel zawrh chhawn chu dan bawhchhiatna a nih avangin, Aizawl district-ah phalna nei loa tuialhthei zawrh khap a nih thu a puang.

Lalhriatpuia chuan, phalna nei loa tuialhthei (petrol & diesel) zawrh chu Mizoram Motor Spirit and High Speed Diesel (Prevention of Malpractices in Supply and Distribution) Order, 1992 kalh a nih thu a tarlang a, "Petroleum Act, 1934 Section 7 & 8-in a tarlan dan chuan mimalin license ngai loa petrol (class A) an kawl phal chin chu litre 30 (zawrh tur ni lo chauh) leh diesel (blass B) litre 2,500 (container pakhat zel litre 1000 aia tam lo dawng thei chinah) a ni," a ti.

Aizawl district-ah phalna nei loa petrol leh diesel zawrh khap a nih thu tarlangin Magistrate chuan, "Danin a phal chin aia tam mi tumahin an kawl (stock) tur a ni lo," a ti a; thupek zâwm lote chu petrol/diesel mansak an nih dawn bakah, BNS 2023 hmanga hrem theih an nih thu a tarlang.