Mizoramah smart meter 52,886 vuah tawh; 'Kawlphetha hman man ṭha taka khawn turin security deposit kalpui tel a pawimawh - Union Minister

Ministry of Power leh Ministry of Housing & Urban Affairs enkawltu minister Manohar Lal Khattar chuan, kawphetha hman man ṭha taka khawn a nih theih nan pre-paid kalpuinaah security deposit kalpui tel a pawimawh thu a sawi. Mizoramah smart meter 52,886 vuah a ni tawh.

Union Minister ho hian May 29, 2026 khan Secretariat conference hall-ah 'State Review Meeting of Power and Housing & Urban Affairs, Mizoram' neih a ni. Manohar Lal chuan, kawphetha hman man khawn chungchanga harsatna awmte chu zir chiang a, hman man kim taka khawn chhuah a nih theih nan a ṭul anga hma la turin Mizoram Power & Electricity department a chah.

Manohar Lal Khattar chuan, "Smart meter vuah hi sorkar building leh sumdawnna hmun lian aṭanga kalpui ṭan a pawimawh a, kawphetha hman man ṭha taka khawn chhuah a nih theih nan pre-paid kalpuinaah security deposit kalpui tel a pawimawh," a ti.

Ṭhutkhawmah hian, Mizoramah smart meter vuah chhoh mek a ni a, smart meter 2,92,081 vuah tura bituk niin, meter 52,886 (18.01%) vuah tawh a nih thu tarlan a ni.

Kawlphetha chu ram hmasawnna tura hmanraw pawimawh a nih angin, renchem thiam leh siam chhuahna kawngah ruahmanna ṭha neih a ṭul thu sawiin Manohar Lal chuan, nizung hmanga kawlphetha siam uar turin Mizoram PE department a chah a; Mizoram lui pathum - Tlawng, Tuivai leh Chhimtuipuia hydro electric power siam tura ruahmannaah pawh PE Minister chu Delhi-ah sawipui zui a tum thu a sawi.

Review meeting-ah hian Urban Development & Poverty Alleviation (UDPA) minister K Sapdanga leh PE minister F Rodingliana te bakah, department pahnih hotute an tel.

Union Minister hian review meeting zawhah thuthar thehdarhtute a kâwm a; Swacch Bharat Mission (SBM) kum 10 kalpui tawh a nih thu leh chumi chhung chuan Mizoram chuan páwn lêra inthiar awm tawh lohna (open defecation free - ODF) mai piah lamah, ODF+ a nih mek thu a sawi.