June 1, 2026 aṭangin city bus-te stand-ah an ding rei tawh dawn lo

State Transport Authority (STA) chuan thuchhuah siamin, June 1, 2026 aṭangin Aizawl city bus-te stand-ah rei tak ding tawh loin, chuangte an chhuk leh chuang tur stand-a awmte an lâwn chhung chauh an ding tawh dawn tih an tarlang.

STA chuan, Aizawla city bus hmang ṭhinte leh bus neitute tan awlsam leh awmze nei zawka chuan leh chhuk a nih theih nan ruahmanna siam a nih thu a tarlang a, "June 1, 2026 aṭanga thuleh awm hma chu Aizawla city bus service-te chuan an stand-ah rei tak ding tawh loin, passenger luh leh chhuah hun chhung chiah din tawh tur a ni," an ti. Hei hi mipui hmakhaw ngaia ruahman a nih avangin hmang ṭangkai ṭhin turin mipui an ngen.

September - October 2025 khan enchhinna atan Aizawl city bus-te chu an stand-ah rei tak ding loa passenger chhuk leh luh hun chhung chauh ding ṭhin tura tih an lo ni tawh tih STA chuan an sawi a, "Enchhinna hi hlawhtling taka kalpui tawh a ni. Aizawla bus-a chuang ṭhinte tan a ṭhat em avang leh ACBOA pawhin kalpui zel ṭha an tih avangin pick & drop system hi Aizawl khawpuiah kalpui chhunzawm tura rêl a ni," an ti.