Zirchiannain Dungtlang hmun hluiah AD 410-ah mi an chêng tawhah a ngai
Art & Culture depart-ment-in Champhai district-a Dungtlang khaw hmun hlui an zirchianna aṭanga carbon sample lak chhuah result chu nimin khan Art & Culture minister C Lalsawivunga'n a pisaah a puang. Zirchianna aṭangin Dungtlang hmun hluiah AD 410 velah mi an chêng tawh tih hriat a ni.
Art & Culture depart-ment hian North Eastern Council aṭangin Dungtlang hmun hlui zir chianna tur sum an dawng a; Higher and Technical Institute, Mizoram (HATIM), Lungleia Department of History nen ṭang dunin May 2024 aṭang khan zirchianna leh sûlhnu hlui lak chhuah (archaeological excavation) ṭan a ni. Carbon sample an lak chhuahte chu Beta Analytic, Florida, USA-ah an endiktir.
Zirchiannaa a lan danin, Dungtlang khaw hmun hluiah hian ṭum li mihring an lo cheng tawh a, chu chu kum AD 410 - 1830 inkarah a ni a; kum hi carbon dating hmanga chhût a ni. Dungtlanga tianhrâng thlân aṭangin ruhro laih chhuah a lo ni tawh a; Beta Analytic-a endikna aṭangin kum 1740 - 1800 hun laia mi a ni tih nemngheh a ni.
Dungtlang khaw hmun hlui hi kum inzawm zatin an luah lo a, luah loh kum kar âwl eng emaw chen a awm tih finfiah a ni. Endikna dang kalpui mek niin, chanchin kimchang zawk hriat theih beisei a ni bawk.
Dungtlang hmun hlui zir chianna buaipuitute chu archaeologist pahnih - Art & Culture aṭangin Vanlalhuma Singson leh HATIM aṭangin assistant professor Dr Lalhminghlua te an ni.
Result puanna inkhawmah hian Art & Culture department hotute leh Dungtlang khaw mite an tel. Minister chuan, Mizo hnam ro hlu leh hmun hluite Art & Culture department-ah hriattir nachang hre tur leh, tichhe loa venghim turin Mizoram mipui a sáwm.