Rini AI mi 20,000-in download tawh

Mizo ṭawng leh ṭawng danga thu sawi lo chhu (type) chhuak zel thei Rini Speech AI (artificial intelligence) chu May 21, 2026 zanah tlangzarh a ni a; ni nga chhungin mi 20,000-in an (download) tawh.

Pachhunga University College (PUC)-a Mizo department chuan nimin khan PUC Seminar Hall-ah RINI Speech Mizo AI zirhona an buatsaih a; RINI Speech AI siamtu Zoram Thanga chuan, Rini AI chu tlangzarh aṭanga ni nga chhungin ram 100 chuang aṭangin mi 20,000 zetin an download tawh tih a sawi a ni.

Zoram Thanga chuan, Rini AI chu Mizo ṭawng humhalh leh tihhmasawn zelna atana buatsaih a nih thu sawiin, "Rini Speech AI-ah hian ṭawng chi hrang 10 a awm mek. Mizo ṭawnga thu sawi chu ṭawng 10 hmangin rang takin a let thei a, a ziak thei nghal bawk. Mizo ṭawng hi thlûk nei a nih avangin, a thlûk chhinchhiahna (tone marker) mumal neih thuai a ṭul," a ti.

AI siam hming atan ‘Rini’ tih an hmanna chhan sawiin Zoram Thanga chuan, "Rini tih hi tu tan pawh lam awl a nih vang te, Mizo hming tlanglawn tak a nih vang te, rintlak taka siam kan duh vang leh Pathian rinchhan chunga siam a nih vangte a ni," a ti a; Rini chu tihchangtlun zel tur a nih thu a sawi.

Zirhona hi PUC Mizo department HoD Dr H Laldinmawia'n a kaihruai a, PUC principal Prof. H Lalthanzara pawhin thu a sawi. Principal hian PUC Mizo department 6th semester zirlai Tabithi lehkhabu ‘Faded Pages’ tih leh PG zirlaite thawnthu tawi ziahna ‘Kan thawnthu’ tih lehkhabute a tlangzarh nghal a ni. Zirhonaah hian PUC zirlai leh zirtirtu eng emaw zat an tel.

Rini Speech AI siamtu Zoram Thanga hi AI Infrastructure Products, Cloudera, Washington-ah senior principal engineer a ni mek a, Rini Speech AI tlangzarh turin Mizoramah a rawn haw a ni.