Vbc 50 sênga Fish Marketing Center din tur rawtna thehluh Central-in pawm

Union Fisheries, Animal Husbandry and Dairying minister Rajiv Ranjan Singh hoin May 25, Thawhṭanni khan High Court hall-ah hmarchhak state pariatte hmalakna leh sorkar laipui scheme hrang hrang hman ṭangkai dante thlirho a ni. Minister chuan, Mizoram sorkarin sorkar laipuia cheng vbc 50 sênga Fish Marketing Center din tura ngenna a thehluh chu pawm a nih thu a sawi.

Rajiv Ranjan Singh chuan, sorkar laipuiin hmarchhak state-te mawina leh nihphungte pho chhuah a duh tih a sawi a, "Prime minister Modi-a’n hmarchhak bial hmasawnna tura vision a neihte a puitlin theih nan Central-in a theih apiangah hma a la. Sangha khawi, ran vulh leh bawnghnute thara hmasawnna hian hmarchhak bialah economic development ṭha tak a thlen thei. Mizoram sorkarin sorkar laipuia cheng vbc 50 senga Fish Marketing Center din tura ngenna a lo thehluh tawh chu pawm a ni," a ti.

PM kaihhruaina hnuaiah Blue Revolution, Fisheries & Aquaculture Infrastructure Development Fund (FIDF), PM-Matsya Sampada Yojana (PM-MSY) leh hmalakna dang tam tak a awm thu sawiin Union Minister chuan, "Heng hmalaknate avang hian hmarchhak biala sangha thar kum 2014-a ton nuai 3.78 ni ṭhin chu kum 2025-ah chuan ton nuai 7.05-ah a kai," a ti a; kum 2014 - 2025 inkar khan sorkar laipuiin hmarchhak state-te hnenah cheng vbc 2,228 a pek thu a sawi.

Union Minister sawi danin, kum 12 chhunga Central-in hmarchhak state pariat hnena sum a pek dan chu: Assam hnenah vbc 614.11, Tripura hnenah vbc 322.23, Mizoram hnenah vbc 246.79, Arunachal Pradesh hnenah vbc 246.03, Meghalaya hnenah vbc 240.32, Manipur hnenah vbc 236.41, Nagaland hnenah vbc 209.49 leh Sikkim hnenah vbc 109.41 a ni.

Rajiv Ranjan Singh Hmarchhak biala Mission Amrit Sarovar atan cheng vbc 200-300 dah an inhuam thu sawiin, NDDB, NFDB leh central hotu dangte chu hmarchhak state hrang hrang tlawh chhuak a, an mamawh leh theihnate hmuhpui turin a nawr dawn tih a sawi a, "Hmarchhak state-te chuan bawnghnute tharah 37%, artuiah 40% leh saah 15%-in hma a sawn a, hmasawnna nasa zawk hmu zel turin ṭan lak a ṭul," a ti. Ran hri leng ṭhinah sorkar laipui chuan invenna (vaccine) siam turin theihtawp a chhuah reng thu a sawi bawk.

Review meeting-ah hian Fisheries, Animal Husbandry and Dairying minister of state George Kurian leh secretary Naresh Pal Gangwar te pawhin thu an sawi. Hmarchhak state tina Fisheries, Animal Husbandry and Dairying changtu minister ṭheuhte'n an state dinhmun, an harsatna leh hmachhawpte an sawi a; AH&Vety minister C Lalsawivunga leh Fisheries minister Lalthansanga te pawh an tel a ni.