Kuminah Mualkawi, Champhai district-ah sawhthing sâwngbâwlna bun hman tum

Nimin khan CMO conference hall-ah sawhthing sawngbawlna tur, Ginger USP Project kalpui dan tur sawiho a ni a, chief minister Lalduhoma'n a kaihruai. Kumin chhungin sawhthing sâwngbâwlna khawl bun a, mimal investor/entreprenuer/society-te enkawl tir tura duan a ni.

Ṭhutkhawmah hian, Ginger USP Project kalpui dan tur indawt leh hun tiam neia thawh ngai chite sawiho a ni a; tun hi a thawh khatna tur niin, district dangah pawh kalpui zui zel a ni ang.

Sawihonaa tarlan danin, Ginger USP Project hi department panga vel thawhhona tur a ni a, Mualkawi, Champhai district-ah sawhthing sawngbawlna pui ber dah a ni ang. Sawngbawlna pui ber a thlen hmaa sawhthing bun lailâwkna tur sawngbawlna tenau pathum (spoke hub) - Tualcheng, Zotlang leh Vaphaiah dah a ni dawn.

Spoke hub-ah hian sawhthing channa (slicer) leh a tihrona a awm dawn a, sawhthingte chu tihfai a, hralh nghal chi leh hralh nghal mai chi lohte thliar a ni ang. Spoke hub-a tih tih theih loh chin, sawhthing oil siam, branding leh a dangte chu a hmunpui ber Mualkawiah thawn tur a ni.

Ministry of DoNER chuan Mizoram sawhthing chu Unique Selling Proposition (USP) a pe a, chumi behchhan chuan Mizoram Ginger Sustainable Cultivation & Value Chain Development project siam niin, cheng vbc 189.78 sênna tur a ni. Project-a hmalakna pakhat - processing unit dinna atan DoNER chuan North Eastern Council-ah cheng vbc 30.13 a pe tawh.

Sustainable cultiva-tion hi Ministry of Agri-culture & Farmers Welfare te, Ministry of Rural Development te, Ministry of Food Processing Industry te, NABARD, ICAR leh IFAD te nena thawkhoa kalpui tur a ni.

Ṭhutkhawmah hian Agriculture minister PC Vanlalruata, Commerce & Industries minister F Rodingliana, Rural Development minister Prof. Lalnilawma, adviser to chief minister TBC Lalvenchhunga, MLA leh Dr KC Lalmalsawmzauva bakah, sorkar official-te an tel.