Sorkar leh NGO ten ngawrh zawkin ruihhlo do beihpui an thlak dawn

Mizoram sorkar leh tlawmngai pawl (non governmental organisation) hrang hrangte chuan ngawrh lehzuala ruihhlo do beihpui thlak an rêl.

Home department aṭanga thu dawn danin, tun hnaiah Manipur aṭangin Mizoramah ruihhlo a rawn luh nasat avangin ramri vela police indah belh dan tur leh, tlawmngai pawlte pawh a ṭul anga puihbawm dan turte sorkar official-te leh NGO-te chuan an sawiho a ni.

YMA leh YLA ten ruihhlo do kum an puan leh, Home leh Excise & Narcotics department nen Operation Jerico an puan chu bawhzuiin, khawchhak lam aṭang leh Manipur aṭanga ruihhlo rawn luhnate veng turin YMA, Police leh Excise force-te uluk lehzualin duty turin an inhriattir a; a ṭul hun apianga inau tawn thei turin ruahmanna an siam.

Damdawi zuarte'n an licence hmangin tun hnaiah khuh damdawi ruih theih chi dâk (India Post) hmanga chah an uar hle tih report a awm thu Food and Drugs Administration lam hotute aṭangin an dawng a, chutiang tih chingte chu an ina len chilh tur an inruat. A ṭul anga damdawi zawrh licence pawh tihtawpsak a nih theih nan hmalak an rêl bawk.

Ruihhlo ngai khawlaiah an huangtau thar leh tih report a awm avang, chu'ng mite senghawina tur chu sorkarin in sak belhna tur centre ṭhenkhat hnenah ṭanpuina a ruahmansak nghal bawk a ni.