Artuia intodelhna tur project hawng

Ṭawi bialtu MLA Prof. Lalnilawma, minister of state chuan a bial chhung Selingah nimin khan artuia intodelh tur Bána Kaih (Handholding) project a hawng.

Project hian Thingsulthliah, Seling, Thingsul Tlangnuam leh Tuikhurhlu a huam dawn a, pilot project atan ar tui tam chi White Leghorn vulh tur mi 20 thlan a ni. Ar in tur rangva pek an nih bakah, ar note 100 pek an ni a, a man chu MLA fund aṭangin 75% pek a ni a, 25% chu ar vulhtu turte'n an tum ve thung.

Prof. Lalnilawma chuan, sorkarin kut hnathawktute a ngaih pawimawh thu sawiin, "Mahni kea kan din theih nan sorkarin a theih ang angin hma a la mek. Mizoram hian state dang aṭangin artui kan la lut nasa a, artui thar ṭha zawk kan hmuh theih nan ka MLA fund-in kan biala hmalak hi ṭha ka ti a ni," a ti.

Project hi a hlawhtlin theih nan an thawhpui (benificiary)-te an pawimawh thu sawiin Lalnilawma chuan, "Theihtawp in chhuah phawt chuan kan hlawhtling dawn. Theihtawp chhuah a, tih tak zeta titute ṭanpui tur leh an bána kai zel turin ka awm reng a ni," a ti a; project hawn tak chu a bul ṭanna chauh a nih thu a sawi.