Rualelna tisang turin zirlaite chah

Minister of state Prof. Lalnilawma chuan nimin khan a biala Saitual Higher Secondary School-in HSSLC Examination 2026-a an zirlai ti ṭhate chawimawina hun an buatsaih a hmanpui a; zirlaite chu harsatna aṭanga chhelna nun zir tur leh rualelna tisang zel turin a fuih.

Prof. Lalnilawma chuan, zirlai hlawhtling tharte a lawmpui thu sawiin, nu leh pate leh zirtirtute zara hlawhtling an ni tih hre thar leh turin a chah a, "In thil tih apiangah theihtawp chhuah ula, harsatna aṭanga chhel taka nun zir chhoin, rualelna tisang zel ang che u. Ni khatah darkar 24 ṭheuh kan nei a, a hmang thiam apiangin hlawhtlinna an chang dawn," a ti.

A bial mipui tan zirna kawngah theihtawp chhuah a inhuam thu sawiin Minister chuan, zirlaite chu an kal zelna turah hlawhtlinna an chan theih nan duhsakna a hlan.

Saitual HSS-ah hian arts-ah zirlai 91.07%, science-ah 75% leh commerce-ah 94.73% an hlawhtling a ni.