Infiamna chi 8-ah a thiam bik zawn chhuaha chher kan tum - SYS Minister

Sport & Youth Services minister Lalnghinglova Hmar chuan, Olympic-a infiamna chi hrang zinga pariat - archery, badminton, boxing, hockey, judo, taekwondo, weightlifting leh wrestling-ahte a thiam bik zawn chhuaha chher tum a nih thu a sawi.

Lalnghinglova Hmar hian May 19, Thawhlehni zan khan Ramhlun Indoor Stadium-ah Yonex-Sunrise PC Gabriel Lalliansanga Memorial MBA Junior Official Badminton Championship, 2026 a hawnnaah thu a sawi a; sorkarin Olympic 2036 hmathlir neiin a bulṭhut aṭangin infiamna kalpui a tum thu sawiin, "Mizote thiam zâwng, India-ah pawh a ṭhatna Olympic sports discipline pariat - archery, badminton, boxing, hockey, judo, taekwondo, weightlifting leh wrestling-ahte a thiam bik zawn chhuah leh chher chhuah kan tum," a ti.

Infiammite chu Olympic khel pha thei khawpa ṭan la tura fuihin Minister chuan, "Olympic vision nei ula kan duh. Infiamna hian taksa, rilru leh ngaihtuahna thlengin hriselna a thlen a, hriselna atan damdawi ṭha a ni. Mizoram sorkarin ruihhlo do kawngah nasa taka hma a lak mek laiin, zanina kal khawm zingah ruihhloin a tihbuai loh ṭhalai tam tak ka hmu che u a, ka lawm tak zet," a ti a; Mizoramin infiamnaah nasa takin hma a sawn a, badminton chu hmasawnna hmu nasa pawl a nih thu a sawi.

Sports Minister chuan, badminton-ah hun rei lo te chhungin junior leh sub junior-ah te Mizo naupangte an champion leh, champion thei khawpa ṭha tam tak an awm chu a lawm thu a sawi a; inzirtirna ṭha leh dik nena hmalak a nih chuan badminton-in tun aia dinhmun sang zawk a thlen theih thu leh infiammi ṭha tak tak an lo chhuah belh zel a rin thu a sawi bawk.

Badminton championship hawnna inkhawmah hian Exise & Narcotics joint commissioner Peter Zohmingthanga kaihhruaiin kal khawmte'n ruihhlo ti lo turin thutiam an sawi rual a ni.