Damdawi dâwr khâr vek dawn mahse chî-âi lo turin mipui chah

Food & Drugs Administration (Controlling & Licensing Authority) joint director F Lalliantluanga chuan thuchhuah siamin, vawiinah India ram puma damdawi dâwr khâr a nih dawn avanga chî-âi lo turin mipui a chah.

F Lalliantluanga chuan, All India Organisation of Chemists & Druggists-in online/e-pharmacy kaihhnawiha ram puma lungawi lohna an lantir tur chu Mizorama damdawi zuarte pawhin an zawm ve dawn tih a tarlang a, "Sorkar leh private hospital pharmacy-te hawn a nih dawn avangin hengahte hian mamawh a lam theih reng dawn a, ni khat chauh lungawi lohna hi lantir a nih dawn avangin mamawh tâwk bak damdawi lei khawl loh ni se," a ti.

Mizorama damdawi zuarte pawh India ram puma lungawi lohna lantirna hi zawm mah se, rîkrum (emergency) thila damdawi mamawh a awmin dawr hawnsak hram tura ngen leh beisei an nih thu FDA Joint Director chuan a tarlang. FDA officer-te chu an bial ṭheuhah damdawi dâwr khâr vanga damdawi mamawh hmuh zawh loh a awm loh nan hma la vek turin a hriattir bawk.