Central-a lehkha thehluhte ûm zui chak turin CM-in department official-te a chah

Chief minister Lalduhoma kaihhruaiin nimin khan Planning conference hall-ah State Level DISHA Committee (SLDC) an ṭhukhawm. CM chuan sorkar laipui scheme kalpuinaah an lehkha thehluhte ûm zui chak turin department-te a chah.

Lalduhoma chuan, central scheme sum hman dan leh inpek dan kalphung thar SNA-SPARSH hman a nih hnuah sorkar kum tawpa account ti-zero thei lo department an awm avangin harsatna an tawh thu a sawi a, "Khatiang kha awm tawh lo se kan duh a, i ṭang tlâng ang u. Central scheme kan kalpuinaah kan lehkha thehluhte kan ûm zui chak a ngai a, sakuh ser nghah chi a ni lo. CM DO letter thawn a ṭul changte a awm a, inthlahrung loin min rawn hriattir thuai ula, ka lo bawhzui zel ang," a ti.

Central scheme kalpuitu department-te an thawhho thiam a ṭul thu sawiin CM chuan, "A remchanna apianga kan inthlun zawm hian hmalakna a chak a, kan hlawhpui zawk ṭhin. Convergence hi i uar sauh sauh ang u. Irrigation & Water Resources department-in kum rei tak chhunga Central sorkar rawn release theih loh kan fund-te tun hnaiah an hnûk chhuak vek a, ka lawm tak zet," a ti a; department hrang hrangte chu an hmalaknaah theihtawp chhuah zel turin a fuih.

Ṭhutkhawmah hian central scheme kalpuitu department-te kum khat chhung hmalakna endika sawiho a ni a; Rural Development minister Prof. Lalnilawma, Lok Sabha MP Richard Vanlalhmangaiha, MLA panga - T Lalhlimpuia, Lt Col. Clement Lal-hmingthanga, Baryl Vanneihsangi, K Laldawngliana leh K Hrahmo te bakah, department 30 hotute leh sawm bikte an tel.