Hmun 2-a lirthei chesualah mi 3 thi

May 8, Zirtawpni leh nimin khan hmun pahnih - Tuidam leh Dárlâk inkar leh Siaha district-a lirtheia chetsualna vangin mi pahnih an thi.

May 8, 2026 tlai khan Tuidam leh Darlak inkara Sabual lui bulah car chesualin, kawng thlangah a lum a, a hmunah car neitu leh khalhtu Lairokhuma (68), Mamit Chhimveng a thi a, May 9 zan khan vui a ni.

Thu dawn danin, Lairokhuma hi Kawrthethawvenga a unaute nen Kawrthaha an u an tlawh a, an haw lam chu Kawrthethawvenga a unaute a thlah zawhah amahin Mamit a pan. An in a thlen tak loh avangin an zawng a, May 9 zing khan a chetsualna hmunah thiin an hmu a ni.

Nimin khan Lawngtlai aṭanga Myanmar-a bungraw dah tura kal tipper MZ-07 A-1792 chu nimin zing khan Serkawr leh Kawlchaw inkarah chesualin, kawng thlangah a lum a; tipper khalhtu Laltlanhlua (24) s/o Rualkhuma leh C Zomuanpuia (37) s/o C Laldinpuia, Lawngtlai Bazar Veng te a hmunah an thi.

Thu dawn danin, nimin chawhnu dar 1:30 vel khan Laltlanhlua leh C Zomuanpuia te ruang chu Lawngtlai thlenpui a ni a, Lawngtlai District Hospital-ah an ruang enfiah a ni. C Zomuanpuia hi nizan khan vui a ni a, Laltlanhlua chu Ṭiau khaw mi, Lawngtlaia in luah a ni a, nimin khan an khua panpui a ni.