Sorkar ṭha leh langtlang kalpui a ni - Minister Lalrinpuii

2 Mizo Bn NCC bultuma Lunglei C Ṭhuamluaia Muala 'NCC Fest & Parasailing Camp' neih chu May 9, Inrinni khan minister Lalrinpuii'n a hmanpui a; Viksit Bharat 2047 hlawhtlin nan Mizoram sorkarin mipui sorkar ṭha leh langtlang a kalpui mek thu a sawi.

Lalrinpuii chuan, sorkar ṭha leh langtlang kalpui mek a nih thu sawiin, "State chhunga hmasawnna rualkhai tak a awm theih nan theihtawp chhuah a ni a, Lungleia Mizoram State University din tura ruahmanna leh hmun hrang hranga hmasawnna hna thawh kal mek te, Mizorama NCC Fest & Parasailing Camp hmasa ber chhim lama buatsaihte hi a nem nghettu a ni," a ti.

Viksit Bharat 2047 hlawhtlinna chu ṭhalai te, mi rethei te, hmeichhiate leh kut hnathawktuteah a innghah thu sawiin Minister chuan, "Ram hmasawn nan ṭhalaite tihchak leh tihhmasawn a pawimawh a, NCC hi hmanraw ṭha ber pakhat a ni. Ṭhalaite hi ram hma hun innghahna in ni,: a ti a; thiamna, inrelbawlna leh ei leh bar dinhmun danglam zel milin inher rem tur te, thiamna leh theihna tuai hriam zel tur te, ram inpumkhatna vawng nung zel tur leh, ram tana mi chhenfakawm nih tum turin a chah.

National Cadet Corps (NCC) Fest & Parasailing Camp-ah hian NCC Alumni te, NCC leh ṭhalaite tana thawh hlawkte leh ram pum huapa mi hmingṭhate hnenah minister hian chawimawina a hlan a; Fest & Camp puala buatsaih stall hrang hrang a fang bawk.

Mizorama NCC Fest & Parasailing Camp hmasa ber hi May 5-11, 2026 chhung awh tur a ni a; NCC chungchang hriat zauna tur leh NCC zawm tura ṭhalaite fuih phûrna tura ruahman niin, hmarchhak state hrang hrang aṭangin NCC cadet ṭhahnem tak an tel. May 5-7 khan 2nd MAP Ground-ah Parasailing Camp ṭan a ni a, Fest chu May 8-9 chhungin C Ṭhuamluaia Mualah nghah a ni.