AMC sorkar thar lak luh a ni

Aizawl Municipal Corporation (AMC) term linaa sorkar thar chu nimin khan Aizawl district magistrate Lalhriatpuia'n a la lut a; mayor atan H Lalremtluanga leh deputy mayor atan R Lalawmpuii te lak luh an ni.

AMC sorkar lak luhna inkhawm hi AMC commissioner Joseph H Lalramsanga'n a kaihruai a; Aizawl District Magistrate-in ward indawtin, corporator atana thlan thar mi 19-te chu rinawmna thu tiamtirin a la lut.

Corporator lak luh zawhah mayor leh deputy mayor tur thlanna buatsaih a ni a; ZPM ticket-a Ward XIV aṭanga thlan tlin Roy Lalhriatpuia chuan mayor atan ZPM ticket-a Ward VI-a thlan tlin H Lalremtluanga a rawt a, Ward I-a ZPM corporator Vanlalhriata'n a thlâwp. Chuhtu dang an awm loh avangin mayor atan thlan a nih thu Magistrate-in a puang.

Deputy mayor tur thlan leh nghal a ni a; Ward IV aṭanga ZPM corporator Vanlalhriatrengi'n Ward XVI corporator R Lalawmpuii a rawt a, Ward VII corporator Zochhuana'n a thláwp. R Lalawmpuii hi chuhtu awm loin deputy mayor atan thlan a ni. District Magistrate-in AMC mayor atan H Lalremtluanga leh deputy mayor atan R Lalawmpuii te chu rinawmna thu tiamtirin a la lut nghal.

Mayor thar H Lalremtluanga'n executive corporator atan Ward VIII aṭanga thlan tlin Christina Roluahpuii Sailo, Ward XIII corporator Vanlalhruaia, Ward III aṭanga thlan tlin Vanlalfaka leh Ward XVIII corporator K Lalrodinga te a ruat thu a puang a; ZPM ticket-a thlan tlin vek an ni.

Executive corporator atana thlante hi Aizawl District Magistrate chuan rinawmna thu tiamtirin a la lut a; chumi hnuah lak luhna inkhawm tihtawp a ni.

AMC sorkar lak luhna inkhawmah hian chief minister Lalduhoma, Assembly speaker Lalbiakzama, UDPA minister K Sapdanga, minister leh MLA eng emaw zat, corporator chhungte leh thuthar thehdarhtute an tel.

Thu dawn danin, mayor, deputy mayor leh executive corporator-te hna chanpual tur tihfel thawkhat a ni tawh a, mahse, puanzar a la ni lo.