Sorkar website ṭha lawmman sem a ni

Information, Commu-nication & Technology (ICT) department chuan nimin khan Taxation auditorium-ah Mizoram sorkara depart-ment-te leh zirna-inte tana buatsaih, 'Govern-ment Online Excellence Awards, 2025' an sem a, ICT minister Dr Vanlalthlana'n a hmanpui. Department website ṭha berah DPAR leh zirna-in website ṭha berah Hrangbana College ṭhlan a ni.

ICT Minister chuan, information technology hmasawnna vanga mipuiin awlsam zawka tui, electric leh phone bill-te an pek theih tawh thu a sawi a, "Mipui awlsamna tura online service pekah huang zauh zel a ṭul. ICT hmalaknain Mizoramah Artificial Intelligence Center of Excellence (AI-CoE) din turin proposal siam a ni a, district zawng zawnga mobile/internet connectivity ṭha a awm theih nan Mizoram Fibre Grid Network thawh mek a ni," a ti.

Website ṭha thlanah hian pakhatna aṭanga pathumna te hnenah thuchei leh hûnmawi (momento) pek a ni a, palina aṭanga 10-na te hnenah thuchei hlan a ni. Award semnaah hian ICT secretary Dr YLN Reddy leh chief informatics officer James Lalnunmawia te pawhin thu an sawi.

Tarlan danin, award dawngtu tur thlangtu Selection Committee leh Technical Evaluation Committee din a ni a, committee-ah chuan ICT technical expert bakah, Mizoram University, National Infomatic Centre leh NIELIT aṭangin expert an tel. Sorkar departmental website 160 leh zirna-in website 50 endik a ni.