BIS ISI chungchang inzirtir

Food, Civil Supplies & Consumer Affairs depart-ment leh Bureau of Indian Standards (BIS), Guwahati Branch chuan nimin khan Directorate of Economics & Statistics hall-ah BIS ISI chungchang zirhona, 'Awareness programme on BIS ISI Mark Certification for manufacturers of various industries' an buatsaih.

Zirhonaa khuallian Ravi Dadhich, FCSCA secretary chuan, industry hmanga eizawngte tan BIS certification chu sumdawnna huang zauhna atan a pawimawh thu a sawi a, "BSI ISI certification hian customer-te leh industry neitute inkarah inrinngamna a tisang a, sorkar tender, certification neih ngei ngei ngaihna hmunah kawng zauh tak a hawnsak bawk. Thil thar chhuah tam lam (quantity) aiin a ṭha lam (quality) ngaih pawimawh a ṭul," a ti a; Made in India scheme kal zelah Made in Mizoram uar a ṭul thu a sawi.

BIS ISI chungchang inzirtirnaah hian AMC huam chhunga industry nei mi 60 vel an tel a; BIS mithiamte'n BIS leh ISI certification chungchanga hriat tur pawimawhte an sawifiah a; zawhna leh chhanna hun hman a ni.