Health Minister-in hun tiam chhunga sa zo hman turin hna thawktute a hrilh

Health & Family Welfare minister Lalrinpuii chuan khum 50 awm theihna tura Hnahthial District Hospital sak mek nimin khan a tlawh a; damdawi-in satu North East Consultancy Services (NECS) chu an huntiam, December 2026 chhung ngeia sa zo hman turin a hrilh.

NECS-a thawktute'n an hrilh danin, Hnahthial District Hospital tur sak mekah hian hospital structure chu 70% vel zawh a ni tawh a, type–III quarters 70% vel zawh a ni tawh. Type-IV quarters erawh chu hmanrua dahna tur ṭha a awm loh avangin an duh angin hma an la theih lo.

Health Minister chuan, NECS chu rinawm leh hman tlak ngeia sa tur leh hun tiam chhunga sa zo hman ngei turin a hrilh a; hmanraw dahna tur awm loh vanga type-IV quarters sak chhunzawm theih loh chu a vei thu sawiin, damdawi-in hmunhma a enfiah hnuah hmun âwl deuh lai chu an hmanraw dah nan hmang turin a hriattir.

Hnahthial District Hospital bakah, type-III leh type-IV quarters sakna atan hian North East Special Infrastructure Development Scheme (NESIDS) hnuaiah cheng vbc 16 ruahman a ni a; NECS-in August 2024 khan an sa ṭan a, December 25, 2026-a sak zawh tura tih a ni.