KHAWTHLIR

SBI DGM-ah kai

Mizoram Rural Bank chairman Sheryl L Vanchhong chu nimin khan State Bank of India (SBI) deputy general manager-ah a kai a, Mizo hmeichhia zinga SBI DGM hmasa ber a ni. Sheryl L Vanchhong hian October 29, 2001 khan SBI hi probationary officer (scale-I)-in a zawm a, October 29, 2003-ah confirm a ni.

MLA-te'n endik

Legislative Assembly-a Subject Committee-V chuan nimin khan UDPA department hnuaia MINECO-a Aizawl Convention Centre leh Zodin Multilevel Car Parking sak mekte an endik. Endiknaah hian Subject Committee-V chairman Lalramliana Paipuia bakah, member panga - Lalchhuanthanga, H Lalzirliana, R Rohmingliana, Prova Chakma leh Jeje Lalpekhlua te an tel a, Assembly Secretariat leh UDPA department hotute leh contractor-te nen an inkâwm.

Agilus Diagnostic

Assembly speaker Lalbiakzama chuan nimin khan Kulikawnah natna hrik zawn chhuah leh enfiahna Agilus Diagnostic Ltd. a hawng. Agilus Diagnostics hi SRL Diagnostics tih a ni ṭhin a, natna hrik zawn chhuah leh enfiahna test chi hrang hrang 3,600 chuang an nei a, an laboratory tam tak chu NABL leh CAP pawmpui a ni.

Sangha humhalh

Fisheries department leh Green-Ag chuan nimin khan Dapchhuah YMA Information office-ah Mizoram District Transformation Programme kaltlangin 'Training and awareness campaign on Riverine Conservation and Mizoram Fisheries Act' an buatsaih a, Dapchhuah YMA member 100 vel an tel. Mamita Fisheries department mite leh YMA hruaitute'n lui dung humhalh signboard an tar nghal a ni.

Larsapin tlawh

Governor Gen. Dr Vijay Kumar Singh chuan nimin khan Serchhip district-a hmun ṭhenkhat a tlawh a, thawktute nen an inkâwm. Larsap hian Chhingchhipa Sainik School, Serchhipa 14 Assam Rifles leh New Serchhipa Shalom Special School-te a tlawh a ni.

UNPFII-ah tel

April 20 - May 1, 2026 chhunga New York, USA-a United Nation Permanent Forum on Indigenous Issue (UNPFII)-ah Zo ReUnification Organization (ZORO) leh Zo Indigenous Forum (ZIF) aiawhin ZORO general secretary Lalnunfela Chawngthu a tel. Inkhawmpui thupui chu "Ensuring Indigenous peoples' health, including in the conflict' tih a ni a; Lalnunfela Chawngthu pawhin thu a sawi tih ZORO chuan an tarlang.

Bána Kaih sawiho

Lawngtlai District Monitoring Commitee for Handholding (Bana Kaih) chu nimin khan an chairman Donny Lalruatsanga, district bawrhsap kaihhruaiin an ṭhukhawm. Bána Kaih Phase I kalpuinaah hmasawnna tur leh ṭan lak ngaihzualna tam tak a awm thu tarlan a ni a; Phase II-ah chuan theihtawp chhuaha mahni department kaihhnawih progress partner-te uluk zawka vil leh endik ṭhin ni se, an ti.