Bána Kaih ṭanpuina dilna 65 pawm

Mizoram State Policy Coordination Committee (MSPCC) chu nimin khan an vice chairman Dr KC Lalmalsawmzauva, adviser to CM (Handholding) kaihhruaiin Planning meeting hall-ah an ṭhu a; Bána Kaih (Handholding) scheme hnuaia CM Special Package leh loan dilna 65 an pawm.

Ṭhutkhawmah hian CM Special Package hnuaia dilna lut 224 thlir a ni a; Agriculture department hnuaia dilna 19 leh Tourism department hnuaia dilna 11 pawm a ni. Bána Kaih hnuaia loan dilna 50 pawh enho a ni a, dilna 35 pawm a ni. Committee-in dilna a pawmte chu loan petu tur bank-in an enfiah leh ang.

Handholding thawhpui bank-te'n Bana Kaih loan component hnuaia dilna 153 an thawn lêtte chu bank aiawhte leh implementing department aiawhte'n an sawiho a, dilna ṭhenkhat chu hnawl tlang a ni. Dilna thawn lêt 153-te chu diltute an inhnuhdawh vanga bank-te'n department lama an kir leh te, bank-te'n an zir chian hnua pek tlak loa an ngaihte leh, bank dang emaw, scheme dang emaw hnuaia loan pek a fuh zawk dawn vanga kir lehte a ni.