MZP-in HSSLC 2026 topper-te chawimawi

MZP chuan nimin khan IPR Auditorium-ah HSSLC Examination 2026-a arts, science leh commerce-a ti ṭha ber (topper)-te chawimawina an buatsaih a; minister of state Prof. Lalnilawma’n hmanpuiin, zirlaite chu awm mai mai lo turin a chah.

Prof. Lalnilawma chuan, zirlaite chu an hma hun atan hmatlir thui tak nei turin a chah a, "Hlawhtlinna hi vanneihna vang ni loin, thawhrimna leh duhthlanna hman dikna aṭanga neih tur a ni. Vawiina kan chawimawite pawh tunah topper ni mah u la, in inthlahdah chuan nakinah mi hnungah in la tlan thei," a ti a, theihtawp chhuaha zir zel turin a fuih.

Nih tum leh thil tih tumah chiang tura zirlaite chahin Minister chuan, "Vawiina kan duhthlanna hian nakin hun tur a hril avangin duhthlanna dik kan neih a pawimawh. Tuna zirlaite hian in zir tur ang in zir zawh hunah hnain a rawn pan hun che u in ngah chuan in ti fuh kher lo ang," a ti a; an tih theih tawk leh an tuinaah theihtawp chhuah turin a chah.

MZP-in an chawimawite hi HSSLC 2026 arts-a pakhatna Lalnunhlui, science-a pakhatna Lalmoipuia Lawmzual leh commerce-a pakhatna Vanlaltleipuia te an ni a; St. Paul's Higher Secondary School zirlai vek an ni.

Chawimawina inkhawmah hian MZP adviser Lalhruaitluanga Chawngte-in fuihna thu a sawi a, MZP president C Lalremruata'n thu a sawi bawk.