CSAB leh JOSAA counselling kaltlanga Mizote tana engineering zir theih sawifiah

Central Seat Allocation Board (CSAB) hotute chuan nimin khan Aizawl Press Club-ah thuthar thehdarhtute an kâwm a; Mizorama zirlaite tana CSAB leh JOSAA counselling kaltlanga engineering zir theihna remchang awmte an sawifiah.

CSAB hotute chuan, NIT Mizoramah kum tin seat 190 a awm thu leh chu'ng zinga 50% (seat 95) chu Mizorama zirlai (home state quota)-te tana dah a nih thu an sawi a, "June 2, 2026 aṭangin JOSAA website a inhawng dawn a, JoSAA round-6 a zawh hnuah seat la awm ang angte chu CSAB Special Round hmanga hnawhkhah leh a ni ang," an ti.

Mizoram tana CSAB - North East & Union Territory (NEUT) ṭhat bikna sawiin CSAB hotute chuan, "CSAB-NEUT hi hmarchhak state-te leh union territory tana seat dah a ni a, Mizoram tan BE/B.Tech-ah seat 116, architecture-ah seat panga leh NERIST-ah seat pariat dah a ni," an ti a, 2026 June thla chawlhkar thumna velah registration ṭan a nih dawn thu an sawi.

CSAB hotute sawi danin, JOSAA-ah hian pawl 12-ah mark 75% hmuh a ngaih rualin, hmarchhak state-te leh UT-a chengte tan 45% a ni a, SC/ST tan 40% a ni. Chutihrualin, JEE Main-ah rank neih a ngai tel thung.

Pharmacy (B.Pharm) zir duh tan JEE Main exam a ngai lo a, pawl 12 mark aggregate aṭanga thlan a ni a; zirlaite leh nu leh pate chu hun ṭha bawhpelh lo tur leh inbuatsaih ṭan turin CSAB hotute chuan an ngen. June 2, 2026 aṭangin help center-te hawn ṭan a ni dawn a, hre chiang duh tan Directorate of Higher & Technical Education-ah zawh chian theih a ni.