CM leh NITI Aayog member inkâwm

Chief minister Lalduhoma leh NITI Aayog member kal chhuak tur Dr Vinod Kumar Paul chu nimin khan New Delhi-a Mizoram House-ah an inkâwm a, kawng hrang hranga Mizoramin hma a sawn theih dan tur an sawi dun. CM hi minister of state Lalnghinglova Hmar-in a ṭawiawm.

CM Lalduhoma chuan, NITI Aayog-in Mizoram a duhsaknaah a lawm thu leh sawhthing chungchanga an hmalaknate chu Mizoramin a chhawr mek thu sawiin, "Ginger Capital of India-ah min puang khan rah ṭha a chhuah. Mizoram chu ziak leh chhiar thiam kimna state hmasa ber a ni a, eirûkna leh hlemhlêtna laka state finlhlim ber niin, khualzin hîp kawnga hmasawn leh India rama state ralmuang ber a ni," a ti a; Mizorama silai keng pawl awmchhun chu tun hnaiah inremna ziahpui a nih thu a sawi.

Dr VK Paul chuan, NITI Aayog-a a hun chhungin Mizoram sorkar nen ṭha taka an thawhho avangin a lawm thu a sawi a; Mizoram chu state ralmuang a nih thu state dangte pawhin an hriatpui thu sawi bawk.

Lalnghinglova Hmar pawhin, NITI Aayog leh Mizoram sorkarin Tourism Conclave an buatsaih dun tura hmalaknate a sawi a; May 2026 thla chawhnu lamah Delhi-ah Pre-Conclave Meeting neih dan tur leh Tourism Conclave-a NITI Aayog hmalaknate official lamin an hrilhfiah.

NITI Aayog hian Mizoram puala tourism policy changtlung zawk duan dan tur te, Mizoram puala Institute of Hotel Management-Ashok (IHM-A) hnuaia a thlawna training neih theih dan tur leh investor koh luh chungchangte Chief Minister leh Tourism Minister an sawipui bawk.