Union Textiles Minister a rawn zin

Union Textiles minister Giriraj Singh chuan nimin khan Aizawl a rawn thleng a, chief minister Lalduhoma hoin Lengpuiah lo hmuah a ni.

Giriraj Singh hi Lengpui Airport-ah CM Lalduhoma nen an inkawm a; chumi hnuah Lok Bhavan panin, larsap Gen. Dr Vijay Kumar Singh nen an inkâwm. Sorkar department hrang hrang hotute nen pawh an inkâwm a; Sericulture, Cooperation, Agriculture, Handloom & Handicraft hotute'n an hmalaknate an hrilhfiah.

Textiles Minister hian nimin vek khan Lapar Seri Boutique, Kulikawn leh Zozia Silk Emporium, Tlangnuam a tlawh a; Cooperative Federations member-te nen an inkawm bakah, BJP hruaitute nen an inkâwm bawk.

Giriraj Singh hian vawiinah Zemabawka Sericulture Farm leh ZOHANDCO pisa a tlawh dawn a, puantahtute leh mithiamte nen an inkâwm dawn. Chawhnua Mizoram a chhuahsan hmain Lengpuia Eri Farm a tlawh bawk ang.