Nuai 174.75 hû ruihhlo tihchhiat a ni

Central YMA hnuaia ruihhlo dotu Central Anti-Drugs Squad (CADS)-in ruihhlo an man khawm cheng nuai 174.75 hû chu May 2, Inrinni zing khan CYMA Hall-ah Home minister K Sapdanga hoin tihchhiat a ni. Minister chuan, ruihhlo laka Aizawl khawlai then fai hnatlang neih thuai tum a nih thu a sawi.

CADS-in ruihhlo an man May 2-a tihchhiat tâkte chu kumin January 20 leh May 1 inkara mante niin, ruihhlo chi hrang hrang a ni a, a vaiin Rs 1,74,75,090 hù a ni. Ruihhlo tihchhiat zingah heroin tam berin, hawng 317 leh Tictac búr 1,185 a ni a, heroin bik hi Rs 1,63,95,000 hùa chhût a ni.

Home minister K Sapdanga chuan, ruihhlo donaah sorkar leh tlawmngai pawl, a bikin YMA nena thawhhona chu a hlawhtling thu leh thlamuanpuiawm a tih thu sawiin, tlawmngai pawlte hmalakna avangin sorkar tih tur tam tak a zângkhai phah thu a sawi.

Ruihhlo do danah tharum nena bul ṭan a, counselling nena hmalak zui chu a ṭangkai thu sawiin K Sapdanga chuan, ruihhlo ti ṭhinte counselling pekah kohhrante'n nasa taka hma an lak thu a sawi a; sorkar, tlawmngai pawl leh kohhran te an ṭan ho zelna chuan Mizo ṭhalaite ruihhlo lakah a chhan chhuah ngei a beisei thu sawiin, "Hmalakna thar atan khawlai then fai hnatlang pawh neih leh thuai tum a ni," a ti.

CYMA president R Lalngheta pawhin thu sawiin, YMA kumpuan 'Ruihhlo do' hmanga CADS member-te thawhrimna chu chhuanawm a tih thu sawiin, "Taima tak leh rim taka kan do zel chuan Pathianin hlawhtlinna min la pe zel dawn a ni," a ti a; Mizo ṭhalaite tichhetu ruihhlo lakah indo puan a nih thu leh thil ṭha lo laka mahni inven reng a ṭul thu a sawi.

Ruihhlo tihchhiatna inkhawm hi CYMA general secretary Prof. Malsawmliana’n kaihruai a, assistant secretary SF David Ngursangzuala'n ruihhlo chungchanga CYMA leh CADS hmalak dan a sawifiah. Inkhawmah hian CYMA hruaiutte bakah, CADS member-te an tel a ni.