CAB dotu Ronald Sapa lo haw MZP-in tawlhlohpuan nen hmuak

Citizenship Amendment Bill, 2019 sawihonaa a do zawnga vote thlaktu, Mizoram Rajya Sabha MP Ronald Sapa Tlau chuan nimin khan Lengpui Airport a lo thleng a, Mizo Zirlai Pawl-in lo hmuakin, tawlhlohpuan an bahtir. Ronald Sapa chuan, "CAB/CAA kan do loh hian kan amen pui tihna a ni," a ti.

Amah hmuaktute hmaah thu sawiin Ronald Sapa chuan, "CAB 2019 chungchangah kan tum ram kan thleng thei lo hi Mizoram mipui min thláwptute an zahawm tak zet a, a pawi ka ti tak zet a ni. Kan sahuai kah hlum emaw kan tih kha a lo tho leh a, ram tana thil pawi tak a rawn thlen ta hi a pawi hle a ni," a ti.

Lok Sabha MP chuan, BJP pawisain thil a  ti thei hle tih sawiin, "BJP hi khawvela party hausa ber an ni a, CAA chung­changah pawh hian an hausakna hian kawngro a su hle niin a lang. Party 12 laiin min support laiin BJP an han che tak tak chu a vàwrtàwpah chuan min phatsan ta zeuh zeuh mai a ni. Party bakah, MP mal pawh min phatsan an awm nual," a ti a, Rajya Sabha-ah an dan hneh tâk loh thu a sawi.

CAA kalpui a nih hnuah Mizoram dinhmun a him lo thei tih sawi langin, "Tunah hian ILP state min thlawh khûm rih mah se, dan loa lo lutte hian CAA-in a huam state khawiah emaw citizenship an va nei ang a, Mizoramah an lo lut thei tho. Hei hi Mizoram tan a pawi em em dawn a ni," a ti.

BJP thil tum sawiin, "BJP-in an tum ber chu Hindu lal ram, Hindustan din a ni. Ayodhya temple-ah hnehna an chang tawh a, Uniform Civil Code an la hmabak. UCC phei hi chu Mizoramin tih tak zeta kan do a ngai a ni," a ti a; CAA do tura pên chhuak Mizo ṭhalaite fakin, Mizoram ṭhalai, CAB dodaltute dodalna chu Mizoram history-ah ziah a ni dawn a, ropui a tih thu a sawi.

MZP president B Vanlaltána pawhin thu sawiin, Congress MP an hmuah loh thu a sawi a, "Mizo mipui MP a nihna avangin kan hmuak.  MZP chuan political party-ah tih bik leh tih loh bik a nei lo. Pu Ronald Sapa hian Mizo mipui duh loh CAB theihtawp chhuaha a do avangin kan lo hmuak a ni," a ti.

Mizoramin MP pahnih a nei a, pakhatin kohhran leh mipui duh dan kalhin CAB a thlâwp thu sawiin MZP President chuan, "Chawimawi tlak chu kan chawimawi zel ang a, do ngai chu kan do zel dawn," a ti a, CAA chu MZP-in an do zel dawn thu a sawi a ni.