Sialkal Range Development Council hi khaw 15 huamtir tawh kan tum - Chief Minister

Chief minister Lalduhoma chuan, Sialkal Range Development Council (SRDC) chu khaw paruk chauh huamtir loin, khaw 15 huamtir turin hma an lak mek thu a sawi.

CM Lalduhoma hian April 30, Ningania HPC-DC(LF)-ten Central Training Institute (CTI), Sesawnga ralthuam an tunna inkhawmah thu sawiin, tun hmain SRDC chu Paihte hnamte chenna bik khaw paruk tana siam a nih thu a sawi a, "A kal zel a, bill kan han pu lut a, Select Committee-ah refer a ni. Hmanni lawkah Select Committee kan ṭhukhawm," a ti.

Chi bil anga khaw paruk lek tana council neih chu a fel lo e, tel ve duh dang tel ve rawh se, tih chu NGO-te duh dan a nih thu sawiin Lalduhoma chuan, "A Demand Committee hote nen pawh inkawm a ni," a ti a; 'A duh apiang lo tel ve rawh se, Paihte bil tan kan rilruah a awm rêng rêng lo' tiin zau taka Demand Committee an inhawn thu a sawi.

Chief Minister chuan, SRDC chu khaw paruk ni loin, khaw 15 huam tawh turin hmalak mek a nih thu a sawi a, "An duh dawn leh dawn loh kan zawt ang a, a duh an tel ang a, a duh lo an tel lo mai ang," a ti.

February 23, 2026 khan Assembly session-ah chief minister Lalduhoma put luh, 'Sialkal Range Development Council (SRDC) Bill, 2026' chu sawiho a ni a, pawm (pass) rih loin, Mizoram Legislative Assembly hnuaia Select Committee zir chian tura dah a ni.

Assembly House-ah hian member-te'n an sawiho hnuah Parliamentary Affairs minister Vanlalhlana leh CM Lalduhoma te chuan Select Committee zir chian tura dah an rawt a, eptu member-te pawhin an remti. Bill hi Select Committee-in an zir chiang a, rawtna an siam ang.

SRDC Bill-in a tum ber chu, SRDC-ah inthlan buatsaih a, Sinlung Hills Development Council ang deuha mumal zawka kaltir a ni. Bill-a tarlan dan chuan, member paruk thlan tur a ni a, chief executive member, chairman leh executive member an awm dawn a, secretary atan BDO hman tur a ni.