AIR kum 90 tlin lawmna hawng

All India Radio (AIR)-in kumina kum 90 a tlin lawmna tur khuh hawnna, Lamp Lighting Ceremony chu nimin khan All India Radio, Aizawl Station, Tuikhuahtlangah neih a ni a; AIR, Aizawl director DR Lalropuia'n Akashvani-in kum 90 a tlin lawmna pualin FM tower-a 'AIR 90 Years' chhit a hawng.

AIR hi June 8, 1936 khan All India Radio hming vuah a ni a, Ministry of Information and Broadcasting hnuaia mi niin, Akashvani (voice from the sky) tia sawi a ni bawk. Report hnuhnung bera tarlan danin, AIR hian ram pumah regional station 133, local radio station 92, relay centre 361 leh community radio station panga a nei a, a vaiin broadcasting centre 591 a nei. Aizawl Station pawhin July 31, 2026-ah kum 60 a tling dawn.

DR Lalropuia chuan, radio hi India-in zalenna a neih hma aṭanga tun thlengin mipui awi tleitu ber a nih ṭhin thu sawiin, "Tun thlengin mipui rin ber a ni," a ti a; tunlai hmasawn zel ruala AIR-in hma a sawn theih nan thawktute chu theihtawp chhuah turin a chah.

AIR, Aizawl assistant director (RNU) Gin Gangte pawhin thu sawiin, ṭhangtharteah radio hlutna a zual zel theih nan thawktute theihtawp chhuah turin a fuih a ni.

AIR, Aizawl hian AIR kum 90 tlin hi kawng hrang hrangin an lawm dawn a; walkathon bakah a lawmna pui ber June 8 khian Vanapa Hall-ah hman a ni ang.