Chite lui humhalh leh chei dan tur rêl

Governor Gen. Dr Vijay Kumar Singh hoin nimin khan Lok Bhavan-ah PWD hotute leh Save Chite Lui Coordination Committee hruaitute an ṭhu a, Save Chite Lui Action Plan Phase-II (lui cheibawl leh cheiṭhat) atana project kalpui mek chungchang an sawiho.

Gen. VK Singh, Save Chite Lui Coordination Committee patron ni bawk chuan, Chite lui humhalh leh cheibawlnaah theihtawp chhuaha ṭanrual a pawimawh thu a sawi a, "Chite lui hi khawpui thli luan luhna ber a nih avangin checkgate/dam te a khât tâwka dah a, bawlhhlawh tângte thenfai zel a ṭul," a ti.

Larsap chuan, Chite lui kamah awmze nei taka thingphun a ṭul thu sawiin, "A chhehvela veng, NGO leh department te nen thawhhona mumal tak neih a pawimawh," a ti a; ruahmanna (DPR) tihhlawhtlin theih ngei tur leh hriatthiam awlsam siam tum turin kal khawmte a chah.

Save Chite Lui Coordination Committee hian PWD leh Environment, Forests & Climate Change department-te nen ṭanghoin Chite lui cheibawl leh cheiṭhatna tur project an kalpui mek ni.

Governor hoa inkawm-naah hian Save Chite Lui Coordination Committee leh PWD hotute chuan Save Chite Lui Action Plan phase-II chungchang an sawifiah a; Larsap chuan thurawn hrang hrangte a pek bakah, project chu a hlawhtlin nan theihtawp chhuah a tum thu a hrilh a ni.