Chhiarpui neih mek chungchangah Bawrhsapin Kolasib MJA-te a kâwm

Kolasib bawrhsap H Dolianbuaia, principal census officer ni bawk chuan nimin khan DC conference hall-ah Mizoram Journalists' Association (MJA) Kolasib District member-te kâwmin, Census of India 2027 tih mek a hrilhfiah a; sakhaw thil leh chhan hrang hrang vanga chhiarpuia tel duh lo an awm zeuh zeuh thu a sawi.

H Dolianbuaia chuan, hlawhtling taka chhiarpui tih a nih theih nan thawktute ruat an nih tawh thu leh uluk taka training neihpui an nih tawh thu a sawi a, "Chhiarpui neih mekah hian harsatna tlema zawng a awm a, sakhaw thil leh chhan hrang hrang vanga chhiarpuia tel duh lo an awm zeuh ṭhin. Chhiarpui hi mihring zat leh dinhmun chhiarna mai a ni a, sakhua leh thil dangte nena inzawmna a neih loh avangin hlauhthawn tur a awm lo tih hrilhfiah zel turin thawktute chah an ni," a ti.

Assam leh Mizoram ramri chung-changa harsatna awm, Google map-a Mizoram chhung ṭhenkhat Assam anga lang chu Census Directorate-ah thlen a nih tawh thu sawiin H Dolianbuaia chuan, "An chhânna nghah mek a ni," a ti. Chanchinbumite chu mipui hnenah chhiarpui pawimawhna bakah, thu dik leh rintlak thehdarh ṭhin turin a ngen bawk.