UPC-NEI inkhawmpui lian a ṭiak; Nasa zawka ruihhlo do an rel

United Pentecostal Church of North East India inkhawmpui lian ber, general conference vawi 58-na chuan nasa zawka ruihhlo do kawnga hmalak an rel a; kum 2026-28 UPC-NEI general superintendent atan Rev Zohmingthanzama an thlang nawn.

LPS Arena, Falkland Venga April 23, Ningani zan aṭanga ṭan UPC-NEI General Conference hi nizan khan a ṭiak a; inkhawmpui thupui atan 'Isua Krista lo kal lehna' Thupuan 22:12 tih hman niin, rawngbawltu hrang hrangin Pathian thu an hril a ni.

April 25, Inrinni khan General Kohhranpui Rorel Inkawm neih a ni a, UPC North East India huam chhunga rawngbawlna kawnga hmalak dan tur hrang hrang rel niin, chu'ng zingah chuan India hmarchhak pumhuapa ruihhlo do kawnga hmalak rawtna chu an pawm a, Executive Board bawhzui turin an dah.

Inrinni zingah khan Mualpui Kohhran Biak-inah UPC-NEI general hruaitute thlanna neih niin, kum 2026-28 chhunga general superintendent ni lai Rev Zohmingthanzama chu a chanvo ngaiah thlan nawn niin, general secretary ni lai Rev Lalmalsawma Sailo leh general treasurer ni lai Rev R Laichhingpuiate pawh an chanvo ngaiah thlan nawn leh an ni bawk.

Inkhawmpui report bu-in a tarlan dan chuan, UPC-NEI hnuaiah hian district 12 leh mission field 11 awmin, kohhran member 1,23,199 an awm mek a ni.