KHAWTHLIR

Ambulance hlan

Reliance Foundation-in Formosa India kaltlanga Central YMA hnena ambulance an hlante chu nimin zing khan YMA Chhimphei Group, Hmuifangtlang Group, Zobawk Group, Chawngte Group, Pangzawl Group bakah MTP Sub Hqrs, Tipa V leh YLA Sub Hqrs, Sangau hnenah ambulance pakhat ṭheuh an hlan. Ambulance hlanna inkhawm hi Aibawk Venghlun kâwnah hman a ni a; Reliance Foundation leh Formosa India aiawh te, CYMA president R Lalngheta leh hruaitu dang te, Chhimphei leh Hmuifangtlang group YMA hruaitute an tel. Ambulance hi Bolero Neo a ni.

Faina hnatlangpui

Urban Development & Poverty Alleviation department bultumin Swachh Bharat Mission (Urban) hnuaiah nimin khan Hnahthialah 'Faina Hnatlangpui' huaihawt a ni. Cleanliness Drive hi Hnahthiala UDPA officer Christina Lalnunfeli'n a kaihruai a, Ropuiliani Hall leh HDVA Court chhehvel leh District Hospital panna kawngte tihfai a ni.

Chhiarpui thlirho

Serchhip bawrhsap Paul L Khuma, principal census officer ni bawk chuan nimin khan Chhiarpui 2027 buaipuitute nen DC meeting hall-ah chhiarpui neih meka hmalak dan leh hmasawnna turte an sawiho. Serchhip district-ah hian chhiarpui hna thawk turin bial panga ṭhen a ni a, viltu officer pakhat ṭheuh bakah, supervisor 31 leh enumerator 169 an awm a ni.

END-in heroin man

Hnahthial district-a Excise and Narcotics department mi leh sate chuan nimin zing khan Khawhri leh Thingsai inkarah Bolero Maxx pickup MZ-03 A-1593 aṭangin heroin (no. 4) hawng 16 (gram 189) leh ruihhlo neitua puh Laihrethanga (28), Siahatla an man. Heroin kengtu hi Lunglei District Court-a inlan turin nimin khan thawn a ni. Laihrethanga sawi danin, heroin hi Duha, Ralpel, Myanmar-a mi ta niin, Hnahthial leh Lunglei lama sem darh tura tih a ni.