ZPM Ṭhalai-in street campaign buatsaih

ZPM Ṭhalai chuan nimin khan Chaltlang, Chanmari, Edenthar Veng, Ramhlun North, Ramthar North leh Zuangtuiah te AMC inthlan atan vantlang inkhawm (street campaign) an buatsaih a; minister pathum - Lalrinpuii, B Lalchhanzova, Lalnghinglova Hmar leh ZPM Ṭhalai president Jeje Lalpekhlua bakah, AMC candidate ten thu an sawi.

ZPM Ṭhalai President chuan, ZPM-in kum hnih sorkarna an chelh tawh chhungin hmasawnna tam tak a awm tih sawiin, "Mizoram ṭhalaite hi ZPM sorkarna hnuaiah kan thla a muang. Kan hmaa sorkar tate'n an rorelnaah theihtawp an lo chhuah tawh thin a, an theih tawk chin chu mipuite'n kan hre tawh," a ti.

Jeje Lalpekhlua chuan, ZPM kaihhruai sorkar hnuaiah advertisement tel loa sorkar hna thawk tur lak a awm lo tih sawiin, "ZPM ṭhalaite'n AMC-ah hian advertisement kaltlang loa hna lak a awm tih kan hria a, kan bawhzui mek. AMC corporator fate pawh an lo la a, heng hnathawk mekte hi an inhnûkdâwk lo a nih chuan ZPM ṭhalaiteṭn kan ûm zui zel dawn," a ti a; zingah thu dik lo chhuak mah se, tlaiah thu dikin a hneh leh ṭhin tih a sawi.

Thusawitu dang minister of state Lalnghinglova Hmar chuan AMC-a ZPM manifesto chungchang a sawi a, "AMC-ah ZPM kan sorkar chuan Building Regulation kan ennawn dawn a, building permission nei tura hun tam tak kan seng ṭhin hian mipui harsatna a siam ṭhin. Rang zawka permission kan neih theih nan Building Regulation kan ennawn dawn," a ti.

Lalnghinglova Hmar chuan, lei laih chungchangah kalphung mumal zawk a awm theih nan dan ennawn an tum thu te, ran vulh khapana dan siamṭhat an tum thu te sawiin, "Vawk vulh hi mi harsa zawkte eizawnna a ni a, veng ṭhenkhatah chuan kalpui theih loh mah se, a theihna vengah chuan khapna dan hi LC-te nena inrâwnin ran vulh theihna dan kan siam dawn," a ti a; Mizo hnam leh sakhua ngai pawimawh chungin tourism tihhmasawn an tum thu a sawi bawk.