Khawzawlah ruihhlo hâl ral a ni

Khawzawl District Drug Disposal Committee chuan April 2, Ningani khan district bawrhsap K Vanlalṭhiana hoin September 2025 leh February 2026 inkara ruihhlo mante an hâl.

Tarlan danin, ruihhlo hâlte chu Rs 11,99,15,000 hû methamphetamine kg 20.743, Rs 1,14,19,000 hû heroin (No 4) gram 582 leh Rs 9,340 hû ganja kg 1.868 a ni a; a vaiin Rs 13,13,43,340 hû a ni. Heng ruihhlo kaihhnawihah hian mi 17 man niin, Khawzawl Police Station-ah thubuai pakua ziah luh a ni.

Khawzawl PS-ah hian kum 2026 chhung khan NDPS Act hnuaiah thubuai 12 ziah luh niin, mi 15 man an ni a; ruihhlo mante chu - methamphetamine kg 11.612, heroin gram 747 leh ganja kg 5.879 a ni.

Kuminah January aṭanga April 2 thleng khan NDPS Act hnuaiah thubuai panga ziah luh tawh niin, mi 10 man an ni a; methamphetamine kg 13.873 leh heroin gram 225 an man tawh bawk.