Chhiarpuiah inziak lut vek turin ngen

Champhai bawrhsap Mohammad Aaquib chuan April 2, Ningani khan a pisaah chanchinbumite kâwmin, Chhiarpui 2027 (Census of India 2027) kalpui dan tur a hrilhfiah a; chhiarpuiah inziak lut vek tur leh thawktute ṭha taka lo thawhpui turin Champhai district mipui a ngen.

Bawrhsap chuan, chhiarpui chu digital veka tih tur a nih avangin chhiartu (enumerator)-te'n in tin tlawh chhuakin mobile phone hmangin chhiarpui an neih dawn thu a sawi a, "Chhiarpui atan enumerator leh supervisor 201 an awm. Chhiarpui neih mekah hian Champhai district mipuite inziak lut vek tur leh chhiarpui kaihhnawiha thawktute ṭha taka lo thawhpui turin ka ngen a ni," a ti.

Champhai district-ah hian bial pali - Champhai Urban, Champhai Rural, Khawbung leh Farkawn siam a ni a; bial tin vil turin nodal officer ruat a ni.

CHHIARPUI 2027

* April 1, 2026-ah ṭan a ni a; India rama chhiarpui vawi 16-na a ni.

* Thawh hniha neih tur a ni a, a thawh khatna chu House Listing & Housing Census (HLO) tia sawi a ni.

* Thawh khatnain September 2026 thleng a awh dawn a; HLO tih hmain ni 15 chhung mahni inziah luhna hun hawn a ni.

* Thawh hnihna chu mihring chhiarna (population enumeration) a ni a, February 2027-ah ṭan a ni ang.

* Population enumeration-ah hian mi tinte chanchin – zirna, chenna, fa neih zat leh thil dang dangte lak khawm a ni dawn.